OUR MOTHER OF PERPETUAL HELP
Ang akdang ito ay tumatalakay sa pagpapatunay at pasasalamat sa isang tunay na Inang Mapagkalinga at Mapagmahal. Ang nasusulat dito ay pawang katotohanan lamang at hango sa tunay na karanasan.
ISANG PAGPAPATUNAY
Isa ako sa mga deboto ng Mahal na Ina ng Laging Saklolo. Siya ang takbuhan ko sa lahat ng oras, tuwing di ko alam ang aking gagawin at kapag ako'y gulong-gulo.
Bilang isang Katoliko ako ay naniniwala sa ating Mahal na Ina ng Laging Saklolo. Noong ako ay bata pa lamang sa mga usap-usapan ko lang nadidinig ang simbahan ng Baclaran. Marami daw ang dumadayo dito upang magbigay pugay sa mapaghimalang Birhen, ang Mother of Perpetual Help. Kaya naman pinangarap ko ang makarating dito upang malaman kung ano nga ba ang misteryong bumabalot sa lugar na iyon.
Naaalala ko pa noong una, ng magsimula akong maghanap ng trabaho sa Maynila. Isang dayuhan na tila walang alam sa panibagong mundong aking napuntahan. Lakas loob akong pumunta sa bahay dalanginan ng Mahal na Ina kahit di ko alam kung saan ito matatagpuan. Sa karamihan ng tao ako ay nakisabay sa paglalakad. Kahit na may kaba sa aking dibdib hindi ito naging hadlang upang ako ay magpatuloy sa aking pupuntahan. Hindi ko maipaliwanag, subalit parang may nagtuturo sa aking mga paa kung saan ang tamang daan patungo sa aking nais puntahan. At sa aking patuloy na paglalakad nakita ko na ang karatula ng National Shrine of Our Mother of Perpetual Help. Nakahinga ako ng maluwag ng makarating na ako at at nawala ang pagod ko sa kabila ng medyo mahabang paglalakad. Tunay ngang ako'y namangha ng makapasok na ako sa loob. Tahimik, maaliwalas na paligid at tila ba puno ng misteryo. Naguumapaw ang aking kagalakan sa loob at labas ng aking pagkatao. Pakiramdam ko ako ay tunay na pinagpapala.
Simula noon naging madalas na ang pagbisita ko sa tahanan ng Mahal na Ina. Kasalukuyan akong naghahanap ng trabaho noon, at pagkatapos kong mag-apply tumutuloy ako sa sa Mahal na Ina upang magpasalamat at humingi na rin ng gabay at patnubay sa ara-araw. Marami rin akong naapplayan, pero di ako pinapalad na matanggap. Pero alam ko na may magandang plano sa akin ang Mahal na Ina. Di nagtagal natanggap ako sa trabaho at patuloy pa rin sa kung ano ang nakagawian ko.
Marami ang nagsasabi na kapag nabuo mo daw ang siyam (9) na araw na Novena ay maari kang humiling sa Mahal na Ina ng Laging Saklolo. Kaya naman ako ay pinilit kong mabuo ang siyam na araw, at patuloy pa rin ang aking pag bisita kahit na natapos ko na ito. Isa sa naging kahilingan ko ay ang makapunta ng ibang bansa, ang makapagtrabaho doon at hanapin ang kapalaran upang mabigyan na rin ng magandang buhay ang aking pamilya.
Matagal ang panahong lumipas at hindi pa rin dinidinig ang aking kahilingan. May mga pagkakataon din na may nag offer sa akin para magtrabaho sa ibang bansa. Akala ko ay un na ang kasagutan sa aking hiling. Subalit lumipas ang panahon at hindi pa rin ako pinalad. Sa kabila ng ito walang nagbago at patuloy pa rin akong nanalig sa Mahal Ina.
Ilang taon ang lumipas, marami na din akong napasukan na trabaho. Pero ang pananalangin sa Mahal na Ina ay hindi nagbago, bagkus lalo pang naging matatag ang aking paniniwala.
December 2006, isang tawag ang aking natanggap mula sa Agency na aking inaplayan. Sila ay naghahanap ng Secretary para sa isang kompanya sa gitnang silangan. Di ko inaksaya ang pagkakataon, sabi ko sa aking sarili na maaring ito na ang kasagutan sa matagal ko ng iniintay. Inayos ko lahat ng mga kailangan na papeles at sinuri ang bawat detalye.
January 2007, isang tawag muli ang aking natanggap mula sa aking agency, kung saan isang magandang balita. Kailangan ko na daw maghanda at magintay para sa aking Visa at Ticket. Hindi ako makapaniwala sa aking narinig nung araw na iyon. Biglang gumulo ang aking isipan, may kaba sa aking dibdib na di ko maipaliwanag. Noong araw ding iyon pagkatapos kong magpunta sa agency para ikonpirma ang balita nagtungo ako sa tahanan ng Mahal na Ina upang magpasalamat at humingi ng gabay upang tulungan akong ihanda ang aking sarili at nawa ito na ang kasagutan sa aking matagal na kahilingan.
Makalipas ang ilang lingo, isang nakakagulat na balita, March 7, 2007 and schecule ng aking flight papuntang Riyadh, K.S.A. nasabi ko na lang sa aking sarili na ito na nga ang kasagutan at lubos ang aking kagalakang nadarama sa pagkakataong iyon. Panibagong yugto ng aking buhay ang magbubukas at kailangan kong harapin ng buong tapang.
Ngayon, ako ay kasalukuyang nagtatrabaho na dito sa Riyadh, K.S.A. Alam ko na kasama ko palagi ang Mahal na Ina saan man ako magpunta, malayo man ako sa aking mahal sa buhay, hindi ako nangangamba dahil alam kong may matibay akong sandata, ang panalangin at isang mapagkalingang Ina.
Tunay ngang mapag-himala ang Mahal na Ina. Magtiwala ka lamang at sa takdang panahon, ang iyong kahilingan at kung talagang laan para sayo ito'y kanyang ipagkakaloob.
Maraming Salamat po Mahal na Ina ng Laging Saklolo. Nawa ay patuloy mo po akong gabayan sa lahat ng aking gagawin upang ang lahat ng mithiin ko sa aking buhay ay aking makamit.
"Ipanalangin mo po kami oh Santang Ina ng Diyos, ng kami'y maging dapat sa mga pangako ni Hesus Kristong aming Panginoon" AMEN.
Mapagmahal at Mapagkalingang INA
Kiko d' Great
04 August 2007, 6:56pm
OUR MOTHER OF PERPETUAL HELP
