My RED RIBBON Family
Ikaw ba ay kapuso o kapamilya?
Masaya ako at ipinagmamalaki na ako ay kapuso at kapamilya. Hindi ko tinutukoy ang Channel 7 at Channel 2. Kapuso at kapamilya sapagkat ito ang naging turing sa akin ng mga nakasama ko trabaho sa Red Ribbon Call Center. Masuwerte ako na nakilala ko ang mga taong ito.
Sa simula ay tila ba isa akong maamong tupa na kailangan kong sumunod at makiramdam sa kanila. Nung ako ay trainee pa lamang ang naging expression ko sa kanila ay mga masusungit at tila ba mahirap pakisamahan at sa sobrang daming produkto ng Red Ribbon parang sobrang hirap matandaan. Kailangan din matutunan ang iba't-ibang lugar at kalye sa parte ng Maynila. Sabi ko sa sarili ko parang di ko kakayanin ang makisama at maging parte ng kanilang grupo. Subalit ako ay nagkamali. Ang mga masusungit na mukha ay napalitan ng mga ngiti ng nagsimula na akong mag training. Para sakin "every beginning is difficult" at alam ko na lahat ay napag-aaralan at natutunan.
"Thank you for calling Red Ribbon Delivery this is KIKO how may I help you?"
---ito ang pamatay na spiel ko sa RRB…
***************************************************************
Si Ma'am Lala ang supervisor ng Red Ribbon Call Center. Mabait at madaling pakisamahan. Mabait siya sakin. Walang araw na di ako late gawa na rin ng layo ng bahay ko sa opisina pero malawak ang kanyang pang-unawa.
Si Ma'am Jez at Aloha ang mga verifiers. Si Ma'am Jez, isang tipo ng tao na maingay pero natutuwa ako sa kanya sapagkat siya ang tanungan ko pag hindi ko alam ang dapat kong gawin.
Si Aloha, tamahik lang siya at focus sa trabaho pero wag ka marami siyang tagahanga sa mga sangay ng Red Ribbon. Maaring may mala-anghel siyang tinig sa likod ng telepono.
Si Kuya Nhol siya ang taong di ko malilimutan, sapagkat siya ang gumabay at nagturo sa akin nung ako ay trainee pa lamang. Hanga ako sa taong ito sapagkat marami siyang alam pagdating sa mga kalye at kabisado ang mga produkto. Siya rin ang clown sa office. Noong una akala ko di ko siya makakasundo, strikto pag nagsalita, may laman pag nagbiro pero mali pala ang aking hinala. Sobrang kulit ng taong ito. Siya ang nagbibigay saya pag ako ay inaantok sa opisina.
Si Joei, direct to the point pag nagsalita. Ang dakilang tindera sa opisina. Isa rin siya sa mga taong nagtrain sa akin. Naaalala ko pa noong una mas malakas pa ang boses niya sa akin kaya ung caller dinig na dinig siya. Masarap ang mga tinda niyang sandwich. Kaya lang di pwede utang, cash dapat. Isa rin siya sa bumabasag sa katamihikan sa opisina.
Si Jha-jha, isang malambing at makulit na kasama. Hilig niya ang kumain, mang-istorbo pag natutulog. Siya ang puppet ko sa opisina, siya rin ang madalas ko kakulitan. Palagi siya may baong mais. Sa isip-isip ko nga siguro may taniman sila.
Si Bing, the text twist master. Tahimik pero makulit. Elegante magdala ng damit. Sosyal pag sumagot ng caller. Parang international call center ang dating. Siya ang taga-sagot pag di ko alam ang nilalaro kong text twist. Isang sulyap konting isip at gotcha, alam na niya ang salitang pinahuhulaan.
Si Shamin, ang pinakabata sa opisina. Tahimik lang at laging mukang seryoso. Bilib din ako sa taong ito malakas kumain ng kanin.
Si Ate Fel, isa sa mga clown sa opisina. Mahilig magpatawa at masiyahing kasama.
Si Ate Jane, sa unang tingin isang babaeng galit sa lalaki. Sa madaling salita suplada. Pero masarap kasama sa mga gimmicks at madadala ka sa kanya kapag tumawa na.
Si Josan, may maamong mukha na di mo maiiwasang mapatulala. Pag dating sa boses para kang nakikipag-usap sa isang bata. Tahimik lang ang taong ito pero pala-ngiti.
Si Mhady, ang dakilang iniirog ni jha-jha. Isa sa mga text twist addict. Serious type person at tapat sa kanyang minamahal.
Si Sir Rhouel, seryosong tao. Tahimik at strikto. Di ko siya masyado nakasama sa mga gimmicks pero alam kong may ginintuang puso at mababang loob.
Si Jaz, ang kikay sa grupo. Mahilig mag mix and match pag dating sa pananamit. Malambing pero kalog. Palagi ko siya iniintay na umuwi sapagkat bago siya umalis lahat ibebeso-beso niya. Kaya excited ako pag uuwi na siya.
Si Mommy Cherry, artistahin pag dating sa looks. May hawig kay Lorna Tolentino. Unang impresiyon ko sa kanya masungit at strikta. Pero nung nakasama ko na, pakiramdam ko kasama ko ang nanay ko. Isang tunay na mommy na nagaalala sa kanyang mga anak. Palagi niya ako hinahanap sa tuwing lumalakad kami. Para kong isang batang paslit na pag nawala sa kanyang paningin ay di na mapakali. On the go rin siya pag dating sa mga lakad. Siya ang astig na mommy ng grupo.
Si Arline, may mala-anghel na itsura pero kalog din pala. Siya ang madalas kong asarin pag nasa opisina. Tahimik pero talented person. Laman lang siya ng bahay. Madalang sumama sa mga gimmicks. Palagi ko naaalala ng nilibre niya ko ng cake (Tiramisu) kasi nilibre ko din siya kaya patas lang din.
Si Mhabel, nakasama ko na siya nung nasa Meralco pa lang kami. Siya ang partner in crime ko. Palagi ko request sa Supervisor namin na sabay kami ng break. Madalas kami magkasabay sa pagkain at pati sa paguwi. Training pa lang namin iba na ang pakiramdam ko sa kanya. Kaya di nagtagal nahulog ang loob ko at di ko napigilan na ipagtapat ang tunay kong nararamdaman. On the go din siya kahit saang gimmicks at walang arte sa katawan. Simpleng tao na may pangarap sa buhay.
At ang pinaka astig sa lahat…..si Ma'am Eloi. Direct to the point pag nagsalita. Plastic kung plastic. Mahilig mangbara pero masarap kasama. Ang kontra bida ng buhay ko, taga-puna pag late ako, pero siya ang tulay ng pag-ibig ko. Siya ang sabihan ko ng mga sikreto at handang tumulong pag nangailangan ako.
Sila ang mga kapuso at kapamilyang ipinagmamalaki ko. Mga taong naging parte ng buhay ko na kailanman ay di ko malilimutan. Mga araw na hinahanap-hanap ko. Sa kanila ko naramdaman ang pagtanggap sakin bilang isang tunay na kapamilya at kapuso.
"Thank you for calling………………….thank you for being part of my life…."
Mga Kapuso at Kapamilya
KIKO d' GREAT
14 July 2007 03:45pm
