SI INAY AT SI ITAY

Mapalad ako na magkaroon ng mga magulang na tulad nila. Hindi man nila ako nabigyan ng marangyang buhay subalit masaya ako sa kung ano ang naibigay nila sa akin……pagpapalaki sa tamang paraan at puno ng pagmamahal ay sapat na.

Ang aking masipag na Itay. Lumaki sa hirap na dala ng buhay. Bukid ang kanyang naging libangan kaya sa di siya pinalad na makapagtapos ng pag-aaral. Subalit hindi ito naging hadlang upang matugunan niya ang aming mga pangangailangan. Pinalaki niya ako sa tamang paraan at tinuruan ng magandang asal. Isang tunay at matibay na pundasyon ng pamilya.

Ang aking dakila at ulirang Inay. Masipag na tulad ni Itay. Lumaki sa pamilyang salat din sa karangyaan. Isang maunawain at mapagmahal na ina. Tinuruan niya ako ng magandang asal at kung pano mabuhay sa sarili kong paa ng di umaasa sa iba. Isang dakilang ilaw ng tahanan na gagawin ang lahat para sa ikabubuti ng pamilya.


Sila ang mga magulang na tunay ngang ipinagmamalaki ko. Wala ng hihigit pag dating sa kasipagan……pagmamahal na di mapapantayan.

Sila ang inspirasyon ko upang matupad ang aking mga pangarap. Ang mabigyan sila ng magandang buhay na di nila naranasan noon. Di ko man masuklian ang pagmamahal na ibinigay nila, handa akong gawin lahat para sa ikabubuti at kanilang ikasasaya.

Isang malaking tagumpay ang makapagtapos ng pag-aaral. Kayamanan na di makukuha nino man. Ito ang sandata ko ngayon upang harapin ang mga hamon ng buhay.

Malayo man ako sa kanila ngayon, baon ko pa rin ang mga pangaral at mga kaalaman na itinuro nila sa akin. Masasabi kong kaya ko ng mabuhay sa sarili kong paa. Ngayon, nagagamit ko na ang mga itinuro ng aking mga magulang. Ang manatiling mapagkumbaba at magbalik tanaw sa pinanggalingan.

Nawa ay patuloy akong gabayan ng Poong Maykapal sa lahat ng aking gagawin upang mga pangarap na minimithi ay aking makamit.


SI INAY AT SI ITAY
KIKO d' GREAT

15th July 2007 11:47am